أمل أحمد تكتب لمملكتي : ساعات و ساعات

بقلم / أمل احمد

ساعات بيبقى عندي طاقة حب عايزة اوزعها على الناس كلها ..عايزة اكلم واحد واحد اقوله بحبك …عايزة اسأل على كل اللي واحشني …عايزة اعبر عن حبي ليهم كلهم ..عايزة احضنهم اوي ..عايزة اضحكهم و افرحهم ..عايزة اجيبلهم كل الدنيا ..عايزة الف على المستشفيات ..اطبطب عل كل عيان … اجيب حلويات لكل العيال ..الاعب كل قطط الشوارع …مش عايزة اشوف حد تعبان او زعلان او وحيد …كل الناس ..مرة واحدة …و امشي اتنطط و اجري من الفرحة كل ما ارسم بسمة على وش حد


و ساعات … بيبقى حتى اللقمة مالهاش طعم .. النفس مخنوق ..كإنه من خرم إبرة … حتى لبسي مش طايقاه …الكلمة على لساني تقل جبال …مفيش طاقة اسمع حد و لا اشوف حد ..مفيش صبر حتى اقرا كلمتين زيادة …و لا استنى ف اشارة … و لا اعدل ايشارب مش عايز يتلف كويس … مفيش نفس انقي لبس و لا اخرج و لا اشوف مخلوق … و لا طايقة حد يسألني حتى مالك ؟؟ كل الألوان كلها بتتحول ف عيني للون واحد بدرجاته …مفيش ملامح ..مفيش خطوط للصورة.. عايزة اهرب من كل العيون ..من اي سؤال ..من اجابات و تبريرات.. و لا حتى كلمة ( ماحدش ليه دعوة بيا ) حتى ديه ..تقيلة … مفيش طاقة اصالح حد …اللي يزعل يزعل …اللي عايز يفهم غلط ..يفهم …اللي عايز يبعد …مع الف سلامة و خد الباب وراك …و القلب داعيلك 😒
بس الأحلى من دة و دة …ان ف كل الحالات …دوام الحال م المحال …بتلاقي ربنا بيبعتلك حاجة كدة ..تطبطب ..و ترميلك نسمة هوا تاخد بيها نفس طوييييل …يخلي دمك يجري تاني ف عروقك …وشك ينور ..و ترجع تحب الدنيا تاني .. ممكن يكون اي حاجة … حد بتحبه ..رسالة مخفية .. شوكلاتاية …بوست تقراه …ممكن خبر حلو …اي حاجة ماتعرفش تيجي ازاي و من مين …بس الأهم انك تستغلها اول ما تلاقيها …تشوف الحلو و تدور عليه و تمسك فيه …ان شالله قشاية ..امسك فيها بإيدك و سنانك ..اتشعلق ف الفرحة ..اتلكك للضحكة ..افتح صدرك خلي الشمس تدخل قلبك ..اهرب من النكد …انساه…ماتستلمش ابدا ابدا … ما تخليش حاجة تاخدك من نفسك ..و لا تحبسك جوا نفسك …طول ما فينا نفس ..لازم نعيش ..مبسوطين 😊

امل

اضف رد

لن يتم نشر البريد الإلكتروني . الحقول المطلوبة مشار لها بـ *

*

جميع الحقوق محفوظة ©مملكتى الجديده

التصميم شارع 7 - احمد عاطف 01222456301