مصممة الجلود هبه سرحان تؤكد ” دفعة جلود بورسعيد تألقت و اثبتت جدارتها ” حوار – مصطفى العطار


هبه سرحان مصممة جلود دائمة الابداع خاضت رحلة في البحث عن الذات تنقلت خلالها بين بعض الحرف اليدوية باحثة عن الافضل و الاجمل و الانسب لشخصيتها ، شخصية غير تقليدية تحمل بين طيات قلبها الكثير من الاحلام
تقول هبه في بداية حديثها :
انا هبه سرحان خريجة كلية تجارة جامعة السويس
بداية علاقتى بالهاندميد اني كنت باصنع اكسسوار هاند ميد ثم اشتغلت في الديكور لفترة ما
و حاليا بأسوق لأعمالي عن طريق جروب على الفيسبوك ، وانا في الجامعه كنت اول واحده عملت بوكيهات الورد المجفف في بورسعيد وكنت بأبيعها لمحلات الهدايا و باحب كل ما عمل فيه ابتكار و خيال و ابداع و انا مش نمطيه خالص

انضمامي لمبادرة الست المصرية بفرع بورسعيد كانت خطوة مهمه و مبشرة في حياتي الفنية قمت خلال كورس الجلود بتصميم و صناعة ٧ قطع جلدية مابين “شنطة كروس-شنطة وسط-شنطة يد-شنطة كتف
-رانر-علبة مناديل-كوشون ” تحت اشراف و تدريب مستر اسلام محمود مدرب الجلود المحترف الخاص ب المبادرة ..

عن مبادرة الست المصرية ذكرت :
اتعلمت من المبادرة روح الجماعه لاني اول مره اشتغل مع فريق ونساعد بعض بالافكار والخامات والرأي و اتعلمت من رحيمة الشريف اني كنت عنيده و أصبحت عنيده اكتر وعندي اصرار اكتر اني مادمت مؤمنه بحاجه لازم افضل وراها لحد ما احققها
ولاني صديقة رحيمه من سنين مقبل المبادره اتعلمت اسمع لها واسمع لنصايحها .لانها عقليه تجارية و قيادة نسائية فذه


و عن حلمها أكدت بحماس :
حلمي يبقى عندي براند معروف بأسمي مش في الجلود الشنط و بس و الاكسسوار كمان نفسي ادخله في كل قطعه فى ديكور المنازل لاني باعشق فن الديكور واصبحت بعشق الجلود والوانها وانواعها
فباحلم بأذن الله ادمجهم واطلع منهم براند هبه سرحان

و باشكر جدا مستر اسلام على تعليمه لينا وانه كان موجود معانا رغم مرضه و لم يبخل علينا بأي وقت ولا معلومه بالعكس كان بيقعد معانا بعد ميعاد الكورس ويتابع معانا ، و رحيمه مهما قولت مش هاقدر اوفيها حقها تعبت معانا جدا وقلبها علينا بجد وكانت بتمر على واحده واحده تشوفها عايزه ايه و تجيب لنا الخامات و تفضل تنصحنا عايزة الاحسن لينا وبتفتح لنا افكار جديده وتاخدنا بعد ميعاد الكورس في مكان اقامتها تقعد معانا لحد وقت متأخر علشان نخلص شغلنا و نسلم مشروع التخرج
و كل الشكر و الاحترام لرباب الشناوي امينة لجنة المرأه في حزب مستقبل وطن سفيرة القلوب
عملت مجهود معانا و لم تتركنا لحظه ووفرت كل امكانيات الحزب لخدمة المبادره في بورسعيد
و كل الشكر للاستاذ عادل لمعي امين عام حزب مستقبل وطن في بورسعيد لدعمه لينا ووفائه بكل وعوده

و اختتمت هبه سرحان قائلة :
و عايزه اختم حديثي بان احلى فرحه بالنسبه ليا بعد ما استلمت الشهاده وبنتي حضنتني وقالت لي “انا فخوره بيكي ” وبعدها والدتي قالت لي نفس الكلام مما اسعدني جدا ويارب دايما اكون مصدر فخر ليهم

اضف رد

لن يتم نشر البريد الإلكتروني . الحقول المطلوبة مشار لها بـ *

*

جميع الحقوق محفوظة ©مملكتى الجديده

التصميم شارع 7 - احمد عاطف 01222456301